等待結果

21-25/10/2013

分別interview了4間學校,而第2,3間學校都大概會喺依星期知結果,有一間是email通知,有一間係郵寄通知,所以依星期都成日走落去望信箱,管理員都知我地等信,見到我地都會話俾我知郵差黎左未.

interview 第2間果間國際學校,我地都覺得朗朗表現幾好,不過話有過千人報,所以都擔心朗朗唔知會唔會有offer,亦陸續見討論區啲媽媽話收到offer,我地等左2日,都無信,已經打定輸數.點知失望之際,竟然收到信,係第4間基督教果間學校寄黎,話取錄朗朗,真係估都估唔到,朗朗果日狀態咁差,竟然收佢,但朗朗爸爸唔鐘意依間,因為多b6.

但我諗住其他應該唔收,所以依間會照要.收到offer第2日,竟然又收到e mail,第3間機構式,我心水之一果間n班,收左朗朗,我開心到不得了,雖然只安排到下午班,但係我心儀學校,我覺得好啱朗朗讀,所以開心到不得了.

第3日,一心諗住讀依間機構學校,開信箱收到國際學校果封信,結果都係俾左offer朗朗,我都有啲開心,但朗朗爸爸就勁開心,因為佢勁鐘意依間.但最後我地都放棄了依間,無去註冊,因為一黎學費+雜費貴,一個月平均7千,二黎依間課程好谷,要背唐詩,三字經等,雖然依間話銜接上小學課程一定無問題,但我唔想朗朗咁細過就咁辛苦,所以所謂既沙田區名校,最後我地都放棄了,只註冊了一間我覺得啱阿仔讀既學校,我既首要條件係希望朗朗讀書開心.